គ្រប់ដំណាក់កាលនៃការមានផ្ទៃពោះ
៩ខែនៅក្នុងផ្ទៃម្តាយ គឺរយៈពេលប្រហែល 36 សប្តាហ៍ដែលទារកនឹងមានការអភិវឌ្ឍន៍យ៉ាងលឿន ពីដំបូងគ្រាន់តែជាកោសិកាតូចៗ បន្តទៅជាសរីរាង្គនានា និងលូតលាស់រាល់ដំណាក់កាល។ នៅពេលកើត ភាគច្រើនទារកមានប្រវែងជាមធ្យមប្រហែល 50 សង់ទីម៉ែត្រ និងមានទម្ងន់ប្រហែល 3.3 គីឡូក្រាម។
អំឡុងពេលមានផ្ទៃពោះ គ្រូពេទ្យនឹងតាមដានសុខភាព និងការលូតលាស់របស់ទារក បង្ហាញព័ត៌មានពាក់ព័ន្ធ ពន្យល់អំពីការវិវត្តន៍ និងឆ្លើយសំណួរដែលអ្នកកំពុងតែមានកង្វល់ ព្រមទាំងផ្តល់ដំបូន្មានដើម្បីធានាសុខភាពល្អទាំងម្តាយ និងកូន។
ស៊ុតរបស់អ្នក ក្រោយពេលរួមជាមួយស្ប៉ែម នឹងក្លាយជាអំប្រ៊ីយ៉ុង ហើយបន្តអភិវឌ្ឍទៅជាទារក។ ក្នុងដំណើរការនេះ សរីរាង្គ និងប្រព័ន្ធផ្សេងៗរបស់ទារកត្រូវបានបង្កើតឡើង ដោយផ្អែកលើព័ត៌មានហ្សែនពីឪពុក និងម្តាយ។
ក្នុងអំឡុងពេលកំពុងលូតលាស់ ទារកត្រូវបានការពារដោយ ទឹកភ្លោះ ដែលជួយទប់ស្កាត់ការប៉ះទង្គិច និងរក្សាសីតុណ្ហភាពឲ្យស្ថិរភាព ទារកមិនអាចដកដង្ហើម ឬបរិភោគដោយខ្លួនឯងបានទេ រាល់អ្វីដែលទារកត្រូវការ ដូចជា អុកស៊ីសែន សារធាតុចិញ្ចឹម និងការបញ្ចេញកាកសំណល់ ត្រូវបានធ្វើឡើងតាមរយៈ សុក។ សុកមានតួនាទីសំខាន់ក្នុងការទទួលអុកស៊ីសែន និងអាហារពីរាងកាយម្តាយ បន្ទាប់មកផ្គត់ផ្គង់ទៅឲ្យទារក ហើយកាកសំណល់ពីទារកក៏ត្រូវបានបញ្ជូនត្រឡប់ទៅកាន់រាងកាយរបស់ម្តាយវិញដែរ។
សម្រាប់ម្តាយ អំឡុងពេលដំបូងនៃការមានផ្ទៃពោះ អាចមានការលំបាកជាញឹកញាប់ ដូចជា៖ មានអារម្មណ៍ចង់ក្អួត (Morning Sickness) មានការប្រែប្រួលអារម្មណ៍ ឆាប់ខឹង អស់កម្លាំង និងងងុយគេង។ ទោះបីជាយ៉ាងណា ការផ្លាស់ប្តូរទាំងនេះគឺជាភាពធម្មតា ហើយភាគច្រើននឹងថយចុះបន្តិចម្តងៗ នៅពេលចូលខែបន្ទាប់។ ដូច្នេះ សូមអត់ធ្មត់ ថែទាំខ្លួនឯងឲ្យបានល្អ និងអនុវត្តតាមដំបូន្មានរបស់គ្រូពេទ្យ។
ទម្ងន់ និងកម្ពស់នៅសប្ដាហ៍ទី ៤
នៅចុងសប្ដាហ៍ទី 4 ស៊ុតបានបង្កើតជាអំប្រ៊ីយ៉ុងតូចៗ ដែលមានទំហំប្រហែល 0.5 សង់ទីម៉ែត្រ និងទម្ងន់ប្រហែល 0.02 ក្រាម។ កោសិកាកំពុងចាប់ផ្ដើមបែងចែក និងបង្កើតជាសរីរាង្គផ្សេងៗ ទោះបីជាទារកមានរូបរាងតូច ប៉ុន្តែទារកកំពុងវិវត្តន៏យ៉ាងលឿន។
ទម្ងន់ និងកម្ពស់នៅសប្ដាហ៍ទី ៨
នៅចុងសប្ដាហ៍ទី 8 ទារកមានទំហំប្រហែល 3 សង់ទីម៉ែត្រ និងទម្ងន់ប្រហែល 3 ក្រាម។ សរីរាង្គសំខាន់ៗ ដូចជា បេះដូង និងខួរក្បាល កំពុងតែវិវត្តន៏ និងចាប់ផ្ដើមដំណើរការ។ ច្រមុះ ត្រចៀក និងភ្នែក ក៏កំពុងលេចចេញរូបរាងច្បាស់ៗផងដែរ។
ទម្ងន់ និងកម្ពស់នៅសប្ដាហ៍ទី ១២
លក្ខណៈផ្ទៃមុខរបស់ទារកប្រែជាច្បាស់ជាងមុន សរីរាង្គ (តម្រងនោម ថ្លើម ពោះវៀន) ត្រូវបានបង្កើតឡើង ឆ្អឹងខ្នងចាប់ផ្តើមរឹង ឥឡូវនេះអ្នកអាចដឹងបានហើយថាទារកជាក្មេងប្រុស ឬក្មេងស្រី។ ទារកចាប់ផ្តើមផ្លាស់ទី ប៉ុន្តែម្តាយនៅមិនទាន់មានអារម្មណ៍ដឺងទេ។
ការចង្អោរឬក្អួតក្នុងអំឡុងពេលមានផ្ទៃពោះដំបូង គេជឿថាមកពីការប្រែប្រួលអរម៉ូន ប៉ុន្តែមិនទាន់មានមូលហេតុពិតប្រាកដទេ។ ស្ត្រីមួយចំនួនអាចមិនមានរោគសញ្ញានេះផងដែរ។ ដើម្បីបន្ធូរអាការៈ អ្នកគួរញ៉ាំអាហារតិចៗឲ្យបានច្រើនដងក្នុងមួយថ្ងៃ កុំឲ្យក្រពះទទេយូរ ជៀសវាងក្លិនខ្លាំង ឬអាហារដែលមានរសជាតិដិតខ្លាំង ហើយផឹកទឹកឲ្យគ្រប់គ្រាន់។ បើអ្នកក្អួតខ្លាំង ឬស្រកទម្ងន់ខុសប្រក្រតី ត្រូវទៅជួបគ្រូពេទ្យឱ្យបានឆាប់។
សូមពិនិត្យមើលការផ្ដល់យោបល់របស់យើងអំពីសម្ភារះទារក និងរបស់ដែលត្រូវវេចខ្ចប់ក្នុងកាបូបសម្ភពរបស់អ្នក។
ការពិនិត្យសុខភាពនៅអំឡុងពេលមានផ្ទៃពោះ និងអ៊ុលត្រាសោនពេលមានផ្ទៃពោះ គឺជាការត្រួតពិនិត្យសុខភាពជាប្រចាំជាមួយគ្រូពេទ្យ ដើម្បីធានាថា អ្នក និងទារកកំពុងមានសុខភាពល្អ និងការមានផ្ទៃពោះដំណើរការល្អ។
ត្រូវទៅជួបពិនិត្យមុនខែទី 3 ហើយបន្តទៅពិនិត្យរៀងរាល់ខែ រហូតដល់ខែទី 8។
ក្នុងការជួបដំបូង គ្រូពេទ្យនឹងសួរព័ត៌មាន និងសុខភាពរបស់ម្តាយ ព្រមទាំងវាយតម្លៃស្ថានភាពរបស់ម្តាយ ដើម្បីរៀបចំការជួបពិនិត្យនិងតាមដានសុខភាពម្តាយនិងកូនបន្តបន្ទាប់។
Toxoplasmosis គឺជាជំងឺឆ្លងបង្ករឡើងដោយប៉ារ៉ាសិត។ ជាធម្មតាវាមិនមានរោគសញ្ញាអ្វីទេសម្រាប់មនុស្សទូទៅ ប៉ុន្តែសម្រាប់ស្ត្រីមានផ្ទៃពោះ វាអាចមានផលប៉ះពាល់ធ្ងន់ធ្ងរដល់ទារក។
អ្នកអាចឆ្លងជំងឺនេះបានតាមរយៈការទទួលទានសាច់ឆៅ ឬសាច់ដែលមិនឆ្អិនល្អ បន្លែ/ផ្លែឈើដែលលាងសម្អាតមិនស្អាត ឬទឹកមានមេរោគ ដូច្នេះ អ្នកគួរតែទទួលទានអាហារឆ្អិនល្អ និងលាងបន្លែផ្លែឈើឲ្យស្អាតជានិច្ច។
